ad1
Sourashtri sahitya sammelano 07-03-2020 Saturday. venue: Sri Natana Gopala Nayaki Mandir. Chief guest Dr. R.B. Zala and Dr. Pasumpon aski tenu avo avo

Bhaiku...3

பை4கு... ... 

(தி2ன்வொ லேகு)                                   

 

இஷ்ணி பொ4ரெ பை4கு ஸொந்துஸெர தே3ரியொ ஆசீர்வாத்,

குமார கு3ப்து ராஜ் ஜலத்தேவேள் ஒகெ ராஜ்யாதி4காரிகன் (கவர்னர்) ஹொதெ விஸ்வ்வர்முகு பெ3டொ ப3ந்து4வர்மு. தெனு ராஜ்யாதி4காரி ஹோனாத்திக்காம் ஸௌராஷ்ட்ருனுஇ யோக் கு3ம்புகன் ரீ: மக3விந்நிம் ஜொடுஞ்செ – செர்செ – ஹன்னவுன் தொ2வ்லி – செடா3வ்க –தெங்கஸ்மான் து3ஸ்ர நீ; மெனத்திஸான் புனிதம் ஹொய – விலாஸ் ஹொயெ – கொ3புரு க2லஸு ஸெந்த ஸுரிது த4வ்ரொ ப4ந்திராஸ். கி.ப2. 437—438 ஸஹஸ்யா ம:டா3ம் புன்னிமுகு தெர்வ தி2ன்னும் ஈ த4வ்ரொ ஹுட்3ஸொட்3ராஸ். காலாந்த்ரமு அத்3தி3கு ரஜான் ராஜ்ஜல்நிம் தீ த4வ்ரொ பு2ட்2கொ – துட்3கொ ஹொய் ஜேடி3யொ. தெகஹால் தீ த4வ்ரொ புனருத்3தா4ரணு கெர்னொ மெனி கி.ப2. 473 ஒர்ஸு ப2ல்லோ தபஸ்யா ம:டா3ம் புன்னிமு தி3வந்தி3த4வ்ரொ நொவ்வொ கெரி, பீ2ர் பு2ள்ளாஸ்தி2திக் க2ள்ளி அவ்ரியாஸ். ஈ விவருன் மாண்டே3ஸார் டங்கினிம் வத்ஸபதி கவ்னிகன் ஸே.


எமாம் ரீ: அமி 473 ஹூண ஒர்ஸுமூஸ் ஸௌராஷ்ட்ர தே3ஸும் ரீ: ப4ராட் அவந் நிகிளிடி3யாமெநி களாரேஸ். ஸௌராஷ்ட்ர தே3ஸ் ஹொல்லோ துரிடெ3ரஜான் ஸொடி3ப4ராட்3 அவெயொ 473 – வ ஒர்ஸும். ஜெ2டா3க் அவத்தக் நிகிளெ ஒர்ஸு1024 ஹூண ஒர்ஸு. அமி தீ தே3ஸ்.


ஸ்ரீ எப். ஜே. ரிச்சர்ட் (Mr.F.J.Richards)  ஸ்ரீஸர். அடுல் சட்டர்ஜி (Sir Atul Chatterjee)  ஸ்ரீஆர்.ஸெவெல் (Mr.R.Sewell)  மெனத்திஸா ‘சரித்துரு லிக்குநாருன்’’ (வரலாற்றாசிரியர்கள்) மாண்டே3ஸார் டங்கிநிம் ஸங்க3ன் அவெ (473-ம் ப4ராட்3அவெ) கு3ம்புஸ் அத்தொ தெ3க்ஷண் போகும் ஸேத்தெ ஸௌராஷ்ட்ர கு3ம்பு (அமி) மெந்காந் மென்ராஸ்.


கி.ப2.1055 ஒர்ஸு ரீ; ஸௌராஷ்ட்ருநு மால்வா ரீ: நிகிளி தெ3க்ஷண் போகும் அவ்நொ ஹொய்யொ. விந்தி3ய தொ3ங்க3ர் த3டி கல்யாண் வாட் தே3வகி3ரி அவி செராஸ். தேட் தீ3ஸோ (200) ஒர்ஸு ---சொவ்த்3வ ஸதாப்3தி4 (14-ம் நூற்றாண்டு) லெந்து ஸொம்புகந் ஜிவ்ராஸ்.


கி.ப2.1300 ஒர்ஸும் — துரிடெ3ரஜான் தே3வகி3ரிக் அவி தேட் ஸேத்தெ மெந்காநுக் தொ3வ்டெ3வேள் ஸௌராஷ்ட்ருன் தே3வகி3ரிம் ரீ:கம்பிலாம் அவி பொந்நாஸ் ஒர்ஸு ஹொல்லொ ரீ:ரியாஸ். கம்பிலா ஸொடி3நிகிளாத்தெநு துங்கப4த்3ரா நெத்3தி3த3டி விஜயநக3ரமுக் அவி தேட் ஸாஸ்வதங்கந் தே3ட்3ஸோவு (150) ஒர்ஸு ஜிவ்ராஸ்.


ரமாரமி (ஏறத்தாழ) கி.ப2.1400ம் ஸௌராஷ்ட்ருன் தமிழ்நாடு3ம் காப் அவந் நிகிளிடியா. தஞ்சாவூர், மதுரை, வட ஆற்காடு, திருநெல்வேலி ஹொயெ ஈ ஜில்லாமுநும் 1400 ரீ:1450 லெந்து காப் அவ்ராஸ் மெனுவாய். தயோதொ (அதாவது) தஞ்சாவூரும் ஸ்வதந்திர நாயக்க ராஜ்யம் உஜத்தொ ஸீரு அஸி ஒர்ஸு பு2ள்ளொ மெனுவாய்.


இஸோகன் அமி தெ3க்ஷண்புடொ அவி செரந் லோபுலாம் தெட்தேட் ஒக்கொக்கொ கா3முநும் ரீ: ஜிவராஸ் மெநி களாரேஸ். தே வேளும் தெட்தேட் ஸேத்திஸா தெ2வ்டொ3சாலுந் பா4ஷாவத்தாந் அம்ரெ கலாசாரம்முகிந் பா4ஷாம் அவி செர்ரேஸ். ஆதா4ருக் தெ2வ்டயொகிந் துஸ்ரெ விவருணு ‘சர்வலேகும்’ லிக்குஸ் மெநத்தெ களல்லி எக ஸெராவடி முஸள்ளரேஸ்.


இஸக3

தொரெ பா3ந்த3ம் ஹொயெ த3தொ3

ந:ந்கொண்டா3ன் ப3பு சாரநாத்.

 

User Comments

super

shetti.G.Velvenkatesh
Question : 4
+
6=