Sourashtra Time
NOW AVAILABLE IN READY STOCK. RUSH YOUR ORDER FOR hiinun caLisye, hitavun caLisye and cunuk caLisye for Rs. 250/- ONLY.
Advertisement
ஸமூஹ உந்நதி3க்....ShrEyangam 1-11

ஸ்ரேயங்க3ம்:


Vol.6 1st November  2018 Issue:05


ஸமூஹ உந்நதி3க்....

அபுல் ஸமூஹ ஜெநுல்நுந் ஒண்டெ ஸமச்சார் சொக்கட் அந்த3ள்ளுநொ. அபுல் ஜெநமஸ்கிநு மொந்நு ஹட்வநும் ஸெர்கொ ஸமூஹ உந்நதி3க் தெ4ரெ ஹட்வநும் ஸெர்கொ யோக்கநூஸ் ஸேஸே. காய் தெந்தெநு கெரந் காமுநுக் அங்கீ3கார்கிந் கெ4நமுந் அப்3பு3நொ மெநி ஹட்வராஸ். தெமொ கயி சூக் நீ: ந:ந்ந பா3ளுநுக் மெளி து கெர்ரியொ காமுந் சொக்கட் ஸே. இஸோஸ் கெர்நொபா3 மெநி பாட் தெட்டி தி3யெதீ3ஸ்நா தெநொ ஒண்டெ உத்சாகு3கந் கெரய் மெநந் வத்தொ கித்கொ நிஜம்கி திக்கொ நிஜமூஸ் தி மெள்ளொ. 

அஸ்கிதெநு அக்3ராபதி ஹொநொ மெநி ஆஸ பொட3ரி:யொநீ: ஹொயெத் கெரெ காமுநுக் பொ4ரெ ஸபா3ம் அங்கீ3கார் கெர்நாத்தெஹால் தெந்தெநு ஒண்டெகு3ம்பு செர்சிலி ஒண்டொண்டெ ஸ்தாபநாந் ஹரும்ப3ம் கெர்லி வெக்ளதெங்க3 ஸநிம் ஒண்டெ வைரிந்க தெ3க்காந்ஸோந் கெர்லராஸ். த்யே ஸெர்க நா: தெங்க தெங்க3 கா3மு ஸபா4நும் அங்கு3ந் மாய் ஸ்தாப3நாநும் கோந் அக்3ராபதிகந் ஸேகி தெநு ஸமூஹ உந்நதி3க் தெ4ரி ஸங்க3ந் காமுநுந், பா4ஷாக் தெ4ரெ காமுநுந், கலாச்சார் ரீதிம் கெரந் காமுநுகஸ்கி அமி ஹாத் தீ3ஹோர் க2ள்ளி கெர்நொ. திஸொ கெர்நாருக் பொ4ரெ ஸபா4ம் கெ4நம் கெரந்வேள் தெங்க காமுக்மெளி ஒண்டெ அங்கீ3கார் அப்பெ3ஸ் மெநி தெநு ஸொம்பு பொந்த3ந். பொ4ரெ மொந்நு ஸெந்தொ காம்கெரத்தக் அவந். த்யே நா:மெந்தி அவ்ராம்அமீஸ் கெ4நம் கெர்லுவெ மெநெதி இஸோஸ் ஜு2கு ஸ்தாபநாந் ஹொட3ய். கொங்கி ப2லூந் நீ:த்தெ யோசநாந், காமுந் சலய். த்யேஹால் ஸமூஹமுக் நிஷ்டுர் ஜதொ வெக்ள கயி அப்3பு3நா. அப்லாநும் ஐக்யம் நீ: மெநி ப4ராடு3ம் பா4டக மெல்லத்தக் அமீஸ்தா2ம் தி3யெ ஸொக3ந் ரா:ய்.

 

ஹாலிம், அவ்ராம் ஒண்டெ அக்3ராபதி. தெநு அஸ்கி தெமொ வாட் தெ3க்கட்நொ. களாநாத்தெ களய்லி காம்கெர்நொ. நீ:மெநெத் யோசநொ ஸங்கி வாட்தெ3க்கட்நாருக் ஸெஜ்ஜ தொ2வ்லுநொ. தெநு ஸமூஹ உந்நதி3க், பா4ஷொ, ஸாஹித்யமுந் அங்கு3ந் ராஜ்ஜி ஸெந்தொ செரி தொரண்க ஸஹாவுந் அப்33ள்ளத்தக் மெநி அஸ்கிவித3 காமுநுந் கெர்லி ஜாநொ. நீ:மெநத் தெந்நவேங்கு3 அமி ஒண்டெ கு3ம்புதகி ஒண்டெ ஸ்தாபநொ ஹரும்ப3ம் கெர்நாத்தக் தெங்க கோந்ரீதிம் ஸங்கி3 தெ3க்கடி3 காம்கெரடு3வாய்மெநி சிந்தநொ கெரி த்யே தா4நு காமுந் க2டத்தக் யத்தந் கெருவொ மெநி மகு3லரெஸ்.


  வாட் ஸங்க3ரியொ! வடொ ஹொய்யா ஹோநாமெநி! 

ஐக்யம் பஜெ மெநெத் யோக்கந் ர:நொ. ஜயம் அப்33ய் அம்கொ!


 

அஸ்கிதெங்க3 தி3வளி ஸுப4நந்தி3நிந் ஸங்கு3லரியொ.

அஸ்கிநாக் அஸ்கி அப்3பு3நொ.


 

User Comments
Information
Name
Comments
 
Verification Code
1 + 5 =